На 29 Март 2016 година со голема жал се разделивме од нашиот истакнат и драг колега, кинолошкиот судија Владимир Крстевски, член на Стручен совет на Кинолошки сојуз на Република Македонија, човекот кој голем дел од својот живот го посвети за унапредување и развој на македонската кинологија, особено за расата Шарпланинец.

Владимир Крстевски е роден на 15.08.1968 година во Куманово.

Од најрано детство другарувал со Шарпланинецот, а подоцна и како натпреварувач и основач на одгледувачницата за Шарпланинци КЕФ од Куманово во 1988 год.

Неговиот придонес во развојот, чувањето и промоцијата на македонската раса Шарпланинец, како што тој сакаше да го нарече Македонски горостас, беше преку бројни судења, советувања, семинари, стручни собири и трудови.

Во 2010 година ја издава својата книга Македонскиот горстас – Шарпланинец, преведена на повеќе јазици која неуморно ја создаваше истражувајќи цели 4 години.

Трагајќи по татковината на Шарпланинскиот овчар во 2014 година во соработка со Руската Национална телевизија ја раскажа приказната за Шарпланинецот во документарниот филм “Планета собак” посветен за оваа наша автохтона раса.

Од 2000 година е кинолошки судија за расите од 2-ра ФЦИ група-Специјалист за раса Шарпланинец. Судел на многу специјализирани изложби за расата Шарпланинец во Македонија и во државите на поранешна Југославија каде што беше ценет и почитуван како вистински познавач на расата.

Говорејќи за кучињата, често знаеше да каже:

“Ние ги избираме кучињата, а тие нé прифаќаат онакви какви што сме-нивниот живот би требало да биде лекција за нас.

За мене, кинологијата не само што е наука, не само што е живот туку таа е и авантура, а сето тоа си има огромно значење и смисла, тука се чувствувам најугодно, најрелаксиран, најопуштен, со еден збор, БЕСМРТЕН.”

Почивај во мир наш драг пријателе и соработнику.

Со длабоко сочувство до фамилијата Крстевски.

Погребот ќе биде на ден 30 Март 2016 (среда) во 13 часот на градските гробишта во Куманово.